الكاتب محمد عبدالماجد ... وكتاباته عن المريخ

**محمد البضرع** الخميس مايو 30, 2013 4:34 am

بعد كسر (يد) يس ح نسمع اسطوانة (الحضري لازم يرجع يا مخيمر )

< الايامات دي في المريخ ..قاعد اسمع لاغنية مصطفى سيد احمد التى كتبها الشاعر عبدالقادر الكتيابي (لمحتك).

لمحتك
قلت بر امن بديت احلم
الملم قدرتي الباقية
واشد ساعد على المقداف
تلوح لي مدن عينيك
وترفع لى منارة بسمتك سارية
بديت احلم

< الجماعة تاني رجعوا (يحلموا).
< قعدوا يفكروا مرة اخرى في عصام الحضري.
< موضوع حلم المول ..وحلم النادي الاسري ..وحلم المدنية الطبية ..وحلم تحويل المريخ الي شركة مساهمة ..واضح انو كلو (حلم) ساكت.
< خلوا الموال والحاجات التانية ..ورجعوا يفكروا قدر حالهم في (عصام الحضري) من جديد.
< بعد العملو فيهم داك كلو ...ناس المريخ بفكروا تاني في الحضري.
< ولا عجب.
< فقد اعاد المريخ اللاعب (علاءالدين يوسف) الذي وصلت الامور بينه والمريخ الي المحاكم.
< وقصة (البصمة) الشهيرة ..اكيد الجماع بتذكروها (زي القراصة بالدمعة)..اصلها ما بتتنسي.
< المريخ الان اعاد (فييرا) زي كأنو ما في حاجة حصلت.
< وهم يفكرون بنفس الطريقة الان في اعادة عصام الحضري الذي رفض ان يأتي حتى للتحقيق معه.
< الزول دا (التحقيق) قال ما بجي ..تاني عاوزين بيه شنو؟.
< انتوا ما عندكم كرامة.
< المريخ دا ما فيه زول عندو (احساس).
< حبة (شعور) مع الناس ما عندكم.
< شوية عزة ما في.
< الحضري (مندوب) لم يرسله الي الاتحاد العام لكرة القدم السوداني والذي استدعاءه اكثر من مرة ولكن لا حياة لعصام الحضري.
< ولا هببهم.
< تصوروا بعد الحاجات دي كلها ...المريخ الان بفكر في اعادة الحضري ....هذا طبعا اذا وافق الحضري على العودة.
< عصام الحضري الذي لعب لفريق الاهلي المصري قرابة الـ (12) عاما ..رفضوا في الاهلي ان يعيدوه رغم ازمة الحراس التى مر بها نادي القرن.
< مجلس ادارة نادي الاهلي رفض حتى زيارة عصام الحضري الي النادي ..ناهيك عن اعادته للكشوفات.
< الان المريخ يفكر في اعادة الحضري ..جمال الوالي بدأ (يلمح) لعودة الحضري.
< وتلميح جمال الوالي عند ناس كمال دحية وصديق علي صالح اوامر.
< انت تلميحك اوامر.
< هكذا تبدأ الاشياء في المريخ (تلميح) من جمال الوالي ثم (تتطربق) فى رأس عصام الحاج.

كل ما الريح تطارد الموج
أزيد إصرار واحلف بيك
أغير سكة التيار
أقول يا انتى يا اغرق
تلوح لى مدن عينيك
تلوح لى

< ديل غنوا ليه اغنية مصطفى سيد احمد (لمحتك) ذاتها ...وعملوا ليه هذا النص (شعار).
< لذلك من حق عصام الحضري ان يفعل اي شيء في المريخ ..ما في زول بقدر يقول ليه حاجة.
< اذا كان المريخ في قيادته العليا بـ (واليه) بغني للحضري في (لمحتك).
< الناس ديل بدون الحضري ما بركزوا ..ما بثبتوا.

أخاف الضفة ترجع بيك قبل ألحق
أخاف غيم المنى الشايل تسوقو الريح ويتفرق
أخاف ..وأخاف ..وأخاف
واشد ساعد على المجداف
واجيك بقدرتي الباقية
حطام إنسان موسم بشقى الدنيا
مقسم قلبو في الاحزان اجيك فنان
اشد اوتارى واحكي ليك
حكاية إنسان وهب لسكتك نفسو
رسم صورتك على حسو
ربط ساعد على المجداف
وقال يا انت يا اغرق

< غايتو يا جمال الوالي جهّزوا (حوض السباحة) ساكت ..بعد كدا الشاف الحضري في الخرطوم ما كضب.
< تلميحك دا يعني انك جهّزت (حوض السباحة).
< المضحك
ان المريخ اعتاد في كل مرة ان يعيد لينا نفس (السيناريو) ..الذي اعتاد ان
يعيد به الحضري كل ما يشيل شنطتو ويطفش من المريخ ..ويقول ( يا هو يا بيت
ابوي).
< تذكروا ..خلونا نرجع لي ورا شوية.
< الكلام دا ما بعيد.
< عشان ما تقعدوا تنظروا لي ساكت.
< الكلام دا قريب....ونحن بنرجع لتلك الواقعة ...عشان تشوفوا الامور في المريخ بتمشي كيف؟.
< مرة كدا ..في الموسم قبل الماضي ...الحضري شال (شنطتو) زي ما بشيلها كل مرة ..ومشى مصر.
< قال والدته قالت ليه ارجع ...السودان سخن ..ما بتقعد ...وهو ذاتو ما ممكن يجازف ويعلم اولاده في السودان.
< الحضري طبعا ممكن يظهر ليك في برنامج العاشرة مساء مع منى الشاذلي عشان يتكلم لينا عن السلم التعليمي في السودان.
< والحضري اسمو ما بعرف يكتبو.
< وممكن الحضري ينظّر لينا مع وائل الابراشي في (كوبري الفتيحاب) ويقول لينا الكوبري دا مكانتو هنا ما صحيحة.
< ممكن الزول الما عندو رأس دا يعملها.
< واحتمال الحضري يظهر ليك مع (باسم يوسف) نفسو ..عشان يسخر من الحكومة السودانية.
< عادي الحضري ممكن يعملها.
< مع ذلك ناس المريخ في كل لحظة ..برفعوا ليه القبعات.
< والله الحضري دا ما في زول قدر عليه غير عصام الحاج.
< نرجع
ونقول في المرة الاولى عندما اراد مجلس المريخ ان يجد ليه (مبرر) جميل كدا
..وسبب منطقي يعيد به عصام الحضري للمريخ..عملوا ليهم (مسرحية).
< نحن ذاتو صدقناهم.
< مسرحية ما تخرش الموية.
< تفتكروا الجماعة ديل عملوا شنو؟.
< والله لو قلت ليكم ما بتصدقوا..رغم من انكم جميعا شاهدتم المسرحية.
< ناس المريخ لكي يعيدوا الحضري ..سافروا شندي لمواجهة الاهلي شندي.
< الكلام دا في الموسم قبل الماضي.
< حارس المريخ وقتها كان محمد كمال.
< محمد كمال قال ما عندو اي مشكلة ..الاعلام السالب قعد ينفخ ليك في محمد كمال.
< مجلس المريخ عرف ليك محمد كمال دا قدام الاهلي شندي لا بنستر ولا حاجة.
< ولا بنغشكم.
< محمد كمال منو البتستر ليكم قدام الاهلي شندي.
< ناس المريخ عشان يطلعوا من الموقف دا ..تفتكروا عملوا شنو؟.
< كسروا لي محمد كمال (اصبعو).
< كمان ما بتذكروا الكلام دا.
< محمد كمال كسروا ليه (اصبعو) في تمرين المباراة في مدينة شندي.
< اها الحارس الاحتياطي اصبعو اتكسر.
< ويس يوسف ...ما عليه تكل.
< يس شنو البيقف قدام الاهلي شندي؟.
< هو محمد كمال ..الناس ما راضيين بيه.
< اها في الحالة دي المريخاب يتصرفوا كيف؟.
< يجيبوا (الحضري) طوالي.
< انتوا فاكرين (اصبع) محمد كمال الاتكسر دا ..اتكسر ساكت.
< فاكرنو اتكسر (صدفة).
< الزول دا اتكسر اصبعو ..عشان يكون هناك (مبرر) لعودة الحضري.
< وعشان اعلام الهلال (الشفت) دا ما يقول حاجة.
< يوم المباراة الساعة ستة صباحا ..قالوا ليك الحضري وصل مطار الخرطوم.
< جا من وين ما عارف؟.
< حلوا ليه كل مشاكلو ..دفعوا ليه دفع الجن..وجابوه ليك.
< الساعة عشرة صباحا الحضري كان في (شندي).
< ناس شندي لمن اتهجموا.
< المريخاب ضحوا بـ (اصبع) محمد كمال ..عشان خاطر الحضري.
< هسع ناس المريخ عشان يرجعوا الحضري تفتكروا ح يعملوا شنو؟.
< لازم يشوفوا ليهم موضوع اكبر من (الاصبع).
< تتخيلوا انتوا عملوا شنو؟.
< كسروا (ايد) المسكين يس يوسف.
< انتوا يا جماعة ما متابعين الاخبار.
< كلكم عارفين ان حارس المريخ يس (ايدو) اتكسرت.
< الود ايدو اتكسرت.
< ايدو اتكسرت بعد الدورة الاولى ما انتهت.
< اتكسرت في فترة الراحة.
< انتوا بتصدقوا الكلام دا.
< في زول (ايدو) بتتكسر في الاجازة.
< كسروا للولد ايدو ..عشان شنو؟.
< عشان يرجعوا الحضري.
< شفتوا كيف؟.
< الغريب والمدهش ..ان اصبع محمد كمال اتكسر في (تمرين)..وايد يس اتكسرت في تمرين.
< تفتكروا الحكايات دي كلها صدف.
< معقولة بس.
< اصبع محمد كمال ..ممكن نقبلوا ليكم انو اتكسر (صدفة) رغم ان ذلك مستحيلا.
< الكسر (ايد) يس شنو في الوقت دا.
< طبعا المريخاب بعد ايد يس ما اتكسرت ..رجعوا يتكلموا ان اكرم الهادي سليم بقى براهو.
< وان اكرم الهادي سليم ..ما مضمون.
< وان الحضري لازم يرجع يا مخيمر.
< مخمير مين؟.
< انا عارف ..ناس المريخ ديل بجيبوا ليهم محترفين ..غريبين كدا.
< بجيبوهم من وين؟...ما عارف.
< طيب يا جماعة ممكن واحد فيكم يسألني سؤال.
< ممكن تسألوني وتقولوا لي : طيب ليه ما اتكسرت (ايد) اكرم الهادي سليم؟.
< اقول ليكم؟.
< اكرم الهادي سليم (شفت)..ما بكسر ايدو في مضوع الحضري دا.
< اكرم (فول) ما بكسروا للحضري ..عاوزنو يكسر ايدو عشان الحضري يرجع.
< والله اكرم لو كسر ايدو في الوقت دا ..ينوم بيها ..عشان الحضري ما يرجع.
< زول ما يكلموا.
< عشان كدا ...المريخاب شافوا الولد المسكين (يس) دا وكسروا ليه (ايدو).
< عشان شنو؟.
< عشان عودة عصام الحضري تبقى منطقية يا (مخمير).
< وقد بدأ ذلك واضحا من (تلميحات) جمال الوالي.
< وجمال الوالي ما بلمح ساكت.
< هو كان بلمح ساكت ما كان رجع تاني لمجلس ادارة نادي المريخ.
< غايتو الموضوع دا الخاسر الاول فيه عصام الحاج.
< تتخيلوا بعد (الشتائم) والاستفزازات التى وجهها عصام الحضري لعصام الحاج ..الحضري راجع تاني.
< شفت كيف يا عصام الحاج؟.
< تستاهل.
< فاكر الموضوع ح ينتهي عند كمال دحية.
< ملحوظة : جهّزوا حوض السباحة.

هـــوامــــــــــــــــــش

< شايف الايامات دي (موضة) المول راحت.
< ما في واحد بجيب سيرتو.
< وحاية (النادي الاسري) برضو اتلاشت.
< اتبخرت عديل كدا.
< والمدينة الطبية.
< والكلام (الكبار) الكنا بنسعموا داك.
< انتوا ناس (لجنة التسيير) ديل نطوا وإلا شنو؟.
< وين المول يا مخمير؟.
< مخمير مين؟.
< لجنة التسيير عاوز تخم المريخاب بالتسجيلات.
< كلو يوم يجيبوا ليهم (واحد) كدا ..يقولوا عليه (مهاجم).
< المرة دي (الدراريب)..دراريب زول ما بقرأ جرايد.
< جابوا ليهم واحد قالوا كان في اكاديمية برشلونة.
< يا ربي كان في اكاديمية برشلونة بعمل في شنو؟.
< بفحص في الملاريا.
< عادي يعني يكون في اكاديمية برشلونة ..وقت بلة جابر ذاتو كان عاوز يحترف في الدوري الفرنسي.
< انتوا بلة البتودوه الدوري الفرنسي ...ما غريبة عليكم تجيبوا ليكم واحد من اكاديمية برشلونة.
< برشلونة مرة واحدة.
< هسع زولكم دا يطلع زي (مكسيم).
< انتوا دحين مكسيم دا ما قالوا جاء من اكاديمية مانشيستر يوناتيد.
< وسليمانو قالوا ..كابتن منتخب كبير.
< والله نحن كلامك البكون قبل التجسيلات دا ..حفظنها حفظ.
< بكرة ..ان شاءالله نحاول نذكر منكم قنابلكم الكنتوا بتفكوها لينا في الجرايد.
< في كل تسجيلات ..الجماعة ديل بركبوا لينا (الفيلم) دا.
< والله يا جماعة ..الفيلم دا شاهدناه عشرين مرة.
< من جمال الوالي جاء المريخ ..نحن بقينا نشاهد الفيلم دا مرتين في السنة.
< الغريبة انتوا تشيلوا وتصدقوا.
< والله انتوا مساكين.
< خلوا التسجيلات.
< والناس الكانوا في اكاديمية برشلونة.
< ديل كلهم خلوهم.
< المول ...حكايتو شنو؟.
< لسع ما شفنا لينا (كيس اسمنت).
< يا جماعة ..ابدوا لينا في الاساس.
< نزلوا ليكم (كيس) اسمنت ..ناس مزمل بتموه ليكم (قلاب).
< انتوا بس جيبوا (شوال اسمنت)..وخلوا الباقى لي ناس مزمل ابوالقاسم ومعاوية الجاك.
< بتموه ليكم.
< قال نادي اسري قال.
< والله غايتو يا مخمير.
< النادي الاسري عندكم والله.
< ما تكتروا (المحلبية).
< بعدين اول حلوا ديونكم.
< وشوفوا مشكلة وارغو شنو؟.
< الهلال اتعاقد مبدئيا من مروان الحرية.
< الاتجاه الي لاعبين صغار في السن ..امر جيد.
< دوري الدرجة الاولى بالخرطوم فيه اكثر من لاعب.
< ركزوا على صغار السن ..وعلى المواهب الحقيقية.
< واحسموا لينا موضوع (كروجر).
< عاجل : مكسيم دا ح يطبق ليكم في المريخ نفس نظرية (امولادي) التى طبقها في الهلال